Neyðarstjórn

Hugmyndin um Neyðarstjórn hefur verið á sveimi í umræðunni um nokkurt skeið.  Eftirfarandi texta er að finna á heimasíðu Neyðarstjórnar:

,,Koma þarf á neyðarstjórn* á Íslandi, stjórn sem nýtur trausts almennings og umheimsins. Stjórnmálaflokkarnir og stjórnmálamenn njóta hvorugs, heldur búa við megna tortryggni og andúð. Sama er að segja um stjórnsýslu landsins. Hið pólitíska kerfi er komið í þrot og ræður ekki við brýnustu úrlausnarefni þjóðarinnar.

Neyðarstjórnin þarf að fá afmarkaðan tíma til þess að vinna að eftirfarandi verkefnum:
1. Neyðarráðstöfunum í efnahagsmálum
2. Rannsókn á efnahagshruninu
3. Endurskipulagningu stjórnsýslunnar
4. Stjórnlagaþingi

Neyðarstjórn verður skipuð fólki utan þings og nýtur almennrar virðingar og trausts meðal þjóðarinnar. Stjórnin mun fá til liðs við sig færustu sérfræðinga innan lands og utan.

Þegar stjórnlagaþing hefur skilað af sér drögum að nýrri stjórnarskrá, verða þau borin undir þjóðina til samþykktar eða synjunar í þjóðaratkvæðagreiðslu. Samþykki þjóðin drögin verður stofnað nýtt lýðveldi á grundvelli nýrrar stjórnarskrár og boðað til alþingiskosninga.

Tímabært er að snúa baki við gömlu, úrsérgengnu stjórnmálakerfi og reisa kröfuna um utanþingsstjórn. Fulltrúar á Alþingi þurfa að þekkja sinn vitjunartíma og verja slíka stjórn falli.

*Neyðarstjórn almennings er utanþingsstjórn sem forseti Íslands skipar og meirihluti Alþingis sættir sig við."

Biðla til Framsóknarmanna

Fjármálaverkfræði 101

Fjármálaaðgerðum haldið áfram

Grasrótin stendur vaktina

Íslandsplan AGS er því miður reikningsdæmi sem allar líkur benda til að ekki muni ganga upp.  Í því samhengi er ekki úr vegi að rifja upp fréttir af fundi 9 manna þverpólitísksk hóps með fulltrúum AGS á Ísland.  Sjá t.d. hér: http://www.mbl.is/mm/frettir/innlent/2009/12/04/aaetlun_ags_excel_aefing/

Eins má rifja upp að þrír þingmenn Hreyfingarinnar ásamt þremur þingmönnum Framsóknarflokksins hafa lagt fram þingsályktunartillögu um mótun efnahagsáætlunar sem tryggir velferð og stöðugleika án aðstoðar Alþjóðagjaldeyrissjóðsins.  Hana má sjá hér: http://www.althingi.is/altext/138/s/0331.html

Ræða við fulltrúa Noregsstjórnar

Steingrímur J. vill afnema verðtryggingu

Þann 16. febrúar 2009 sagði Steingrímur J. Sigfússon á borgarafundi að hann vildi afnema verðtryggingu.  Það væri gerlegt þegar búið væri að ná henni niður.  Um þetta má m.a. lesa hér.

Þegar þessi ummæli voru viðhöfð var ársverðbólga í kringum 18%.  Því ætti að spyrja Steingrím að því í dag hversu mikið verðbólgan þarf að fara niður til að hægt sé að afnema verðtrygginguna sem Gunnar Tómasson hagfræðingur hefur kallað ,,skálkaskjól stjórnvalda sem hafa hvorki haft vilja né getu til að stjórna peningamálum Íslands".

Vart þarf að minna lesendur á hversu víðtæk andstaðan er við verðtrygginuna en skv. könnunum sem eru um 80% landsmanna fylgjandi afnámi hennar.  Sjá kannanir Capacent í ágúst 2008 og september 2009.

Verðbólgan mælist 6,6%

Nauðungarsölur

Í Silfri Egils um síðustu helgi fjallaði Sveinn Óskar Sigurðsson um nauðungarsölur og ýmsa vankanta á núverandi fyrirkomulagi.

Hér er hægt að nálgast viðtalið:  http://dagskra.ruv.is/sjonvarpid/4472548/2010/01/17/1/

Í frétt á RÚV um málið segir:
,,Í ritgerð sinni um nauðungarsölur og fleira fjallar hann um hversu skaðlegt núverandi kerfi sé samkvæmt nauðungarsölulögum. Í þeim halli mjög á rétt heimilanna, ábyrgð lánveitanda sé afar lítil og við nauðungarsölu á íbúð myndist falskt verð á fasteignum sem skekki efnahag bankanna og valdi bæði hluthöfum þeirra, sem og fjölskyldunum sem missa íbúðirnar, miklu tjóni."
http://www.ruv.is/heim/frettir/frett/store64/item321425/

Nú stígur félagsmálaráðherra fram á sviðið og segir ,,það enga lausn fyrir skuldara að fresta nauðungaruppboðum á íbúðarhúsnæði enn og aftur. Það sé hagur skuldara að ljúka málum sem fyrst."  Eins vonar ráðherra ,,að hægt verði að finna úrræði fyrir sem flesta". http://ruv.is/heim/frettir/frett/store64/item321560/

Getur verið að þau úrræði sem boðið er upp á séu hreinlega ófullnægjandi? Er ekki full ástæða til að staldra við og fara betur yfir málin?

 

 

Ári síðar...

Það vill svo til að stofnfundur HH var haldinn fyrir nákvæmlega ári síðan Samtökin eiga því afmæli í dag, 15. janúar.

Ég óska HH til hamingju með daginn og þakka fyrir þeirra starf.

Vona að sem flestir sjái sér fært að mæta á morgun því málstaðurinn er góður.

Sjötti kröfufundurinn á Austurvelli

Birgitta hjá Mark Keiser um Icesave og þjóðaratkvæðagreiðsluna

Þverpólitísk nefnd um Icesave

Viðtal við Birgittu Jónsdóttur og grasrótarfundur

Hér má sjá viðtal við Birgittu Jónsdóttur á The Alex Jones Show í gær. 

Komið er inn á Icesave málið og þá stöðu sem Íslendingar eru að glíma við.  Ljóst er að málstað okkar erlendis hefur vaxið fiskur um hrygg frá því forsetinn ákvað að vísa Icesave 2 í þjóðaratkvæðagreiðlsu.  Hugsanleg skýring á því er að almenningur um víða veröld efast í auknum mæli um ágæti fjármálakerfa sinna og viðbrögð stjórnvalda vegna kreppunnar.   

Í kvöld (14.1.2010) er svo opinn grasrótarfundur á vegum Hreyfingarinnar á Sólon og hefst hann kl. 20.00.

Eitt af markmiðum Hreyfingarinnar er að hjálpa grasrótarhreyfingum á Íslandi að koma sínum sjónarmiðum á framfæri. Hugmynd Hreyfingarinnar er að hinir ýmsu grasrótarhópar geti komið málefnum á framfæri við Hreyfinguna sem virki sem gátt inn á þing. Þetta er framkvæmanlegt á margvíslegan hátt. Til að mynda með því að tala máli grasrótarhópa innan þings, með framlagningu frumvarpa frá grasrótinni og með því að leggja fram fyrirspurnir til ráðherra. Í sumum tilfellum er ákjósanlegt að kalla einstaklinga úr grasrótinni fyrir þingnefndir og óska eftir umsögnum grasrótarhópa um lagafrumvörp.

Drög að dagskrá:
1. Skýrsla rannsóknarnefndar Alþingis
2. Icesave
3. Málfrelsismiðstöð á Íslandi
4. Stofnun nýrra samtaka launafólks
5. Eineltismál

Stopp í Icesave-málinu þessa dagana

Birgitta Jónsdóttir á The Alex Jones Show

Bless, bless AGS ?

 

Tillaga til þingsályktunar

um mótun efnahagsáætlunar sem tryggir velferð og stöðugleika án aðstoðar Alþjóðagjaldeyrissjóðsins.

Flm.: Birgitta Jónsdóttir, Margrét Tryggvadóttir, Þór Saari, Eygló Harðardóttir, Sigmundur Davíð Gunnlaugsson, Höskuldur Þórhallsson.

    Alþingi ályktar að fela fjármálaráðherra að láta vinna efnahagsáætlun sem tryggir velferð og félagslegan stöðugleika án aðstoðar Alþjóðagjaldeyrissjóðsins. Skilgreindar verði nauðsynlegar aðgerðir til að gera íslenskt hagkerfi óháð aðstoð sjóðsins og forðast frekari skuldsetningu ríkissjóðs, aðgerðaáætlun útbúin og henni fylgt eftir. Leitað verði liðsinnis færustu erlendra sérfræðinga á sviði hagvísinda við mótun og framkvæmd áætlunarinnar til að tryggja þann trúverðugleika efnahagsstjórnar landsins sem er nauðsynlegur.
    Efnahagsáætlunin liggi fyrir 1. október 2010 og komi til framkvæmda fyrir 2011.
    Ráðherra kynni Alþingi efnahagsáætlunina við fyrsta tækifæri eftir að þing hefur verið sett í október 2010.

Greinargerð.

    Mikið vatn hefur runnið til sjávar síðan ákveðið var að fara í samstarf við Alþjóðagjaldeyrissjóðinn. Forsendur hafa gjörbreyst og ljóst að ekki er hægt að treysta á hlutleysi sjóðsins eða að hann framfylgi yfirlýstum markmiðum sínum um að aðstoða þjóðir í fjármála- og gjaldeyriskreppu. Flutningsmenn telja að það hafi sýnt sig að Bretar og Hollendingar hafa misbeitt sjóðnum til að reyna að knýja fram þá niðurstöðu sem þeim hugnast varðandi svokallaðar Icesave-skuldbindingar. Slík vinnubrögð eru algerlega ólíðandi og ættu að vera næg ástæða til að afþakka frekari aðstoð. Þrátt fyrir mikla seinkun á endurskoðun sjóðsins hefur tekist að halda efnahag landsins á floti. Þá telja flutningsmenn það ekki að sjá að endurskoðun sjóðsins hafi haft teljandi áhrif á efnahagslífið.

Ísland, Alþjóðagjaldeyrissjóðurinn og umheimurinn.
    Eftir hrun bankakerfisins síðasta haust kom fátt annað til greina en að leita á náðir Alþjóðagjaldeyrissjóðsins um aðstoð þar sem stjórnvöld komu alls staðar að lokuðum dyrum.
    Ísland er eitt af stofnríkjum Alþjóðagjaldeyrissjóðsins en hann var stofnaður árið 1945. Um 185 lönd eru nú aðilar að sjóðnum. Ísland var skuldlaust við sjóðinn fyrir hrun en hafði þó fengið lán frá honum í fjórgang, fyrst árið 1960 á árum Viðreisnarstjórnarinnar, þá 1967– 1968 þegar síldin hvarf, 1974–1976 þegar verð á olíu hækkaði og loks árið 1982 vegna útflutningsbrests.
    Yfirlýst hlutverk Alþjóðagjaldeyrissjóðsins er að auka samvinnu milli þjóða og tryggja stöðugleika í fjármálakerfum heimsins. Honum ber að aðstoða þjóðir í fjármála- og gjaldeyriskreppu og lána ríkisstjórnum fé til að koma eðlilegum gjaldeyrisviðskiptum í gang.
    Skiptar skoðanir eru um það hvernig Alþjóðagjaldeyrissjóðnum hefur tekist að rækja þetta hlutverk sitt. Hann hefur löngum þótt strangur húsbóndi sem ekki hefur tekið nægilegt tillit til sérstakra og staðbundinna aðstæðna. Sjóðurinn hefur þótt einsýnn í málefnum þróunar- og nýmarkaðslanda þar sem hann hefur lagt höfuðáherslu á gildi nýfrjálshyggjunnar frekar en að laga aðstoð sjóðsins að aðstæðum á hverjum stað.

Hagstjórnartæki Alþjóðagjaldeyrissjóðsins.
    Þrátt fyrir að nú sé meira en áratugur síðan efnahagskreppan í Asíu beindi athyglinni að meiri háttar mistökum Alþjóðagjaldeyrissjóðsins er sjóðurinn enn að gera svipuð mistök í mörgum löndum, sérstaklega í þróunarlöndunum. Á sama tíma og sjóðurinn styður fjárhagslega örvandi aðgerðir í ríkum löndum þvingar hann þróunarlöndin til þess að innleiða kreppudýpkandi hagstjórnaraðgerðir. Sú aðferðafræði hefur verið gagnrýnd á vettvangi Sameinuðu þjóðanna sem settu á fót sérfræðinganefnd undir forustu Joseph Stiglitz til að grafast fyrir um orsakir kreppunnar og áhrif hennar um heim allan. Nefndinni var einnig ætlað að koma með tillögur að aðgerðum til að koma í veg fyrir að álíka atburðir endurtaki sig og vísa á leiðir sem væru líklegri til að koma á efnahagslegum stöðugleika. Um þetta má lesa í skýrslu nefndarinnar, Report of the Commission of Experts of the President of the United Nations General Assembly on Reforms of the International Monetary and Financial System, sem má nálgast á vef SÞ: www.un.org/ga/econcrisissummit/docs/FinalReport_CoE.pdf.
    Víða þar sem Alþjóðagjaldeyrissjóðurinn hefur komið að málum hafa stjórnvöld, sem fyrr segir, verið neydd til að beita kreppudýpkandi aðgerðum og ljóst er að hið sama gildir um Ísland, þrátt fyrir yfirlýsingar ráðamanna um að Ísland fái sérmeðferð. Hagstjórnartækin sem íslensk stjórnvöld eru þvinguð af sjóðnum til að nota eru hátt vaxtastig, mikil skuldsetning vegna gjaldeyrisvarasjóðsins og of hraður niðurskurður. Nýleg könnun sem gerð var af miðstöð fyrir rannsóknir á efnahags- og stjórnmálum í Washington leiddi í ljós að af 41 landi sem Alþjóðagjaldeyrissjóðurinn hefur haft afskipti af undanfarin ár hafa 31 verið þvingað til að beita kreppudýpkandi hagstjórnaraðgerðum: háu vaxtastigi, niðurskurði velferðarkerfisins og aðhaldssemi er varðar aukið peningamagn. Sjóðurinn er þekktur fyrir að leggja of mikla áherslu á að ná jafnvægi í ríkisfjármálum, sem m.a. hefur leitt til mun dýpri kreppu en annars hefði orðið. Dýpt kreppunnar skiptir miklu máli þar sem bæði fyrirtæki og einstaklingar verða fyrir miklum skaða vegna niðurskurðar og stöðnunar í efnahagslífi þjóðarinnar. Í raun er verið að eyðileggja auð þjóðarinnar þar sem ekki er hægt að endurreisa fyrirtæki né heimili sem verða gjaldþrota. Hægari niðurskurður mundi þýða minni samdrátt en á móti mun hann draga úr hagvexti þegar hagkerfið er farið að ná sér á nýjan leik.
    Rannsóknir sýna að fjármálakreppa einkennist af mikilli eignatilfærslu frá þeim fátæku til þeirra ríku. Annað sem einkennir fjármálakreppu er aukinn ójöfnuður sem stafar m.a. af auknu atvinnuleysi og niðurskurði velferðarkerfisins. Markmið hagstjórnar á krepputímum á að vera að auka efnahagslega velferð og leiðirnar að því markmiði eru aðgerðir sem tryggja fulla atvinnu, hagvöxt og stöðugleika til lengri tíma. Efnahagsstefna Alþjóðagjaldeyrissjóðsins og íslenskra stjórnvalda mun ekki ná fram þessum markmiðum. Markmið hennar er aðeins að tryggja að fjármagnseigendur fái sæmilega ávöxtun á fé sitt á meðan það er lokað inni í hagkerfinu og að Seðlabankinn hafi bolmagn til að kaupa krónurnar af þessum fjármagnseigendum þegar hægt verður að afnema gjaldeyrishöftin án þess að krónan fari í frjálst fall.
    Flutningsmenn telja einsýnt að með því að leggja á þjóðarbúið sívaxandi erlendar skuldir verður kreppan lengd um ófyrirsjáanlegan tíma og mikil hætta á að það velferðarkerfi sem við njótum í dag muni líða undir lok ef fer sem horfir.
    Erlendar skuldir landsins eru nú þegar orðnar háskalega miklar og því hætta á að þjóðin þurfi að búa við þann hörmulega veruleika að stór hluti þjóðarframleiðslu muni aðeins renna til þess vonlausa verkefnis að greiða vexti af erlendum skuldum.
    Flutningsmenn telja mikilvægt að ríkisstjórnin leiti allra leiða til að endurreisa efnahagslíf landsins án aðstoðar Alþjóðagjaldeyrissjóðsins og er þingsályktunartillaga þessi því lögð fram. Nú þegar hafa fjölmargir heimsþekktir og sérfróðir menn lagt fram tillögur og hugmyndir um hvernig má losa þjóðina úr fjötrum sjóðsins. Lagðar hafa verið fram tillögur um lánalínur í stað beinna lána og þá hafa sérfræðingar sem unnið hafa fyrir sjóðinn boðist til að vinna með ríkisstjórninni að áætlun um endurreisn Íslands og aðhald í fjármálum sem þætti jafntraust eða traustara meðal lánardrottna okkar en áætlun frá Alþjóðagjaldeyrissjóðnum.
    Flutningsmenn leggja því til að fjármálaráðherra verði falið að láta vinna efnahagsáætlun sem tryggi velferð og félagslegan stöðugleika án aðkomu Alþjóðagjaldeyrissjóðsins. Mikilvægt er að efnahagsáætlunin liggi fyrir sem fyrst eða fyrir 1. október 2010 svo að unnt sé að hefja vinnu sem allra fyrst við að koma henni til framkvæmda fyrir árið 2011.
    Fjármálaráðherra skal kynna Alþingi efnahagsáætlunina við fyrsta tækifæri eftir að þing kemur saman í október 2010 og helst eigi síðar en 5. október 2010.

http://www.althingi.is/altext/138/s/0331.html

Líklegt að AGS-lán frestist