Stuðningsyfirlýsing frá Húseigendafélaginu og Hagsmunasamtökum heimilanna

Hagsmunasamtök heimilanna og Húseigendafélagið lýsa hér með yfir eindregnum stuðningi við tillögu talsmanns neytenda um neyðarlög í þágu neytenda um eignarnám fasteignaveðlána og niðurfærslu þeirra samkvæmt mati lögbundins gerðardóms. Tillaga þessi er vönduð og ítarlega rökstudd og í alla staði mjög virðingarvert framtak. Taka samtökin heilshugar undir þau sjónarmið og rök sem talsmaðurinn reifar og byggir tillögu sín á.

Í ljósi þeirrar neyðar sem orðin er og verður alvarlegri með hverjum deginum sem líður, skora ofangreind samtök á stjórnvöld að veita téðri tillögu og þeim sjónarmiðum sem hún er reist á brautagengi og slá með henni marglofaðri skjaldborg um fjölskyldur og heimilin í landinu.  Brýnt er að bregðast skjótt við. Engan tíma má missa.

___________________________

Reykjavík, 30. apríl 2009 

 f.h. Húseigendafélagsins.                              

Sigurður Helgi Guðjónsson form.

 f.h. Hagsmunasamtaka heimilanna,           

Þórður B. Sigurðsson form.

Viðskiptaráðherra skoðar niðurfærslu

Hagsmunasamtök heimilanna og Húseigendafélagið skora á verkalýðshreyfinguna

Ofangreind hagsmunasamtök, skora á launþegasamtök og verkalýðsfélög landsins að taka afgerandi stöðu með heimilunum í landinu vegna gríðarlegs og hratt vaxandi fjárhagsvanda þeirra, sem er m.a. afleiðing ófyrirsjáanlegra, óeðlilegra og jafnvel ólöglegra hækkana á gengis- og verðtryggðum veðlánum heimilanna í kjölfar efnahagshrunsins.

Um 42% heimila eru með bága eða neikvæða eiginfjárstöðu skv. gögnum Seðlabanka Íslands frá síðustu áramótum.  Allt bendir til að efnahagur þeirra hafi versnað enn frekar frá áramótum og muni halda áfram á þeirri voðabraut, nema gripið verði inn í með almennri leiðréttingu lánanna.  Um 25% heimila landsins eru með gengistryggð veðlán og um 90% þeirra eru í tímabundinni frystingu.  Umsóknum Íbúðarlánasjóðs vegna greiðsluerfiðleika hefur fjölgað um 900% á milli ára.

Forsendur verð- og gengistryggðra lána eru brostnar og þeim heimilum fjölgar ískyggilega hratt sem geta ekki staðið í skilum eða sjá hvorki  tilgang né skynsemi í að greiða af lánum sem hækka stjórnlaust úr öllu valdi .  Kaupmáttur rýrnar óðum og atvinnuleysi er í sögulegum hæðum, sem leiðir til samdráttar í einkaneyslu, sem eykur svo atvinnuleysið enn frekar.

Með samhentu átaki má rjúfa þennan vítahring og snúa þessari óheillaþróun við.  Aukið fjárhagslegt svigrúm heimilanna mun fljótt efla atvinnulífið, draga  úr atvinnuleysi og styrkja afkomu fjármálakerfis, sveitarfélaga og ríkissjóðs.

Undirrituð samtök skora á launþegahreyfingar landsins að knýja á stjórnvöld og kalla eftir tafarlausum almennum leiðréttingum á gengis-og verðtryggðum lánum heimilanna.  Í þessu samhengi er vert að benda á nýlega kynnta sáttartillögu talsmanns neytenda vegna sama vanda.

Skráðir félagar í ofangreindum samtökum eru samtals um 11.000. 

Skora á verkalýðshreyfinguna