Misvísandi ummæli forsætisráðherra

„Þetta voru ákaflega gagnlegar umræður og viðræður við þau og reyndar var það svo að við ætluðum að kalla þau til okkar.  Við höfum verið að kalla til ýmsa aðila, aðila vinnumarkaðarins, bændasamtökin, við munum kalla til LÍÚ í kvöld og stjórnarandstöðuna.  Svo ætluðum við að kalla til Hagsmunasamtök heimilanna en þau komu til okkar, það var bara fínt“.

Svo mælti forsætisráðherra.

Ef maður rýnir ofangreind ummæli fæst ekki annað ráðið en að fundur með Hagsmunasamtökum heimilanna hafi verið á dagskrá forsvarsmanna stjórnarflokkanna í þessum stjórnarmyndunarviðræðunum.  Slík áform eru í eðli sínu hið besta mál enda gefur staðan í landinu stjórnvöldum ærið tilefni til náins samráðs við sem flesta hagsmunaaðila. 

Aftur á móti verð ég að viðurkenna að þetta er í fyrsta sinn sem ég heyri af þessum fyrirhuguðu fundarhöldum, og hef ég þó verið í forsvari fyrir samtökin undanfarið.  

Því er hér með komið á framfæri að Hagsmunasamtök heimilanna áttu ekki fund með forsætisráðherra og fjármálaráðherra í dag eins og ummæli forsætisráðherra gefa til kynna.  Né heldur voru þessi mótmæli á vegum Hagsmunasamtaka heimilanna (ekki frekar en ASÍ sem hvöttu almenning til að taka þátt).

Það er sjálfsagt mál í mínum huga að samtökin eigi fund með stjórnvöldum, enda hafa samtökin ekki skorast undan hingað til.  Ég treysti því að samtökin heyri fljótlega frá forsætisráðherra vegna þess fundar.  Það verður væntanlega um helgina, og í allra síðasta lagi áður en gengið verður endanlega frá stjórnarsáttmálanum, eða hvað?

Kuldaboli bítur mótmælendur

Athugasemdir

[Heiða B. Heiðars, 8.5.2009 kl. 22:24]

Já þetta var undarlegur misskilningur

Jóhanna sagði okkur að þau væru ánægð að sjá okkur vegna þess að þau hefðu akkúrat verið á leiðinni að kalla okkur á fund.
Mér fannst furðulegt að þau skyldu hafa ákveðið að kalla Nýja tíma á fund.... en það kom aldrei fram að þau ættu við Hagsmunasamtök heimilanna fyrr en ég sá það á mbl.is áðan.

Þú ættir að bregðast strax við Þórður og senda þeim skilaboð.

[Marinó G. Njálsson, 8.5.2009 kl. 23:40]

Heiða, þetta var frábær frammistaða hjá ykkur.  Mér þykir leitt að komkast ekki, var á fundi sem dróst lengur en ég bjóst við.  Ég veit að það var ekki þið sem komuð misskilningnum af stað, en fyrir samtökin var nauðsynlegt að leiðrétta þetta.  Með því er engin rýrð kastað á ykkar framgang.  Þú komst vel út í viðtalinu á mbl.is.  Gangi ykkur vel í framtíðinni.