Dómur fellur lántaka í hag

Þá er fyrsti dómurinn í máli sem tekur á lögmæti gengistryggðra lána fallin lántakanda í hag:

http://www.domstolar.is/domaleit/nanar/?ID=E200907206&Domur=2&type=1&Serial=1&Words=

Ég skora á fjölmiðla að gera þessu máli góð skil.

Hvaða þýðingu hefur þetta þegar um 40 þúsund gengistryggðir bílálánssamningar eru í umferð og 11% af húsnæðislánum eru gengistryggð.  Mun þorri þessa fólks ekki leita réttar síns?  Og hvað með fyrirtækin?

Eins og ég sé þetta hafa stjórnvöld þrjá valkosti:

a) að stórauka við fjárframlög til dómskerfisins til að það geti tekið á öllum þessum málum
b) að setja lög um hópmálsókn
c) að hafa forgöngu um almennar leiðréttingar með einhverjum hætti

Ef ég man rétt skýrði viðskiptaráðherra frá því á borgarafundi að við uppgjör bankanna væri gert ráð fyrir því að gengistryggðu lánin væru lögleg.  Skv. Gunnari Tómassyni viðhafði ráðherra þessi ummæli að sama skapi í útvarpsviðtali eins og sjá má hér að neðan.

Birti í tilefni dagsins tölvupóst frá Gunnari Tómassyni til alþingismanna frá 12. september 2009:

 ,,Ágætu alþingismenn. 

Í Kastljósviðtali sl. þriðjudag 8. september vék ég m.a. að því broti lánastofnana á lögum nr. 38/2001 um vexti og verðtryggingu sem felst í bindingu skuldbindinga í íslenzkum krónum við dagsgengi erlendra gjaldmiðla. 

Í viðtali á Bylgjunni sl. fimmtudag 10. september sagði viðskiptaráðherra í upphafi máls að “það hafi verið gengið út frá því til þessa að þessi erlendu lán hafi verið lögleg.”  Ef einhverjir teldu að svo væri ekki, bætti hann við, þá væri það hlutverk dómstóla að skera úr um málið.

Hér er ekki um “erlend lán” að ræða.

Öll krónulán bankanna eru fjármögnuð af tiltækum krónueignum þeirra að meðtöldum innistæðum í Seðlabanka Íslands sem verða til við sölu bankanna til seðlabanka á erlendum gjaldeyri sem þeir hafa keypt af viðskiptavinum eða tekið að láni erlendis. 

Erlend lántaka felur í sér gengisáhættu, sem bankarnir hafa kosið að láta lántakendur axla með bindingu höfuðstóls krónulána við dagsgengi erlendra gjaldmiðla.

Lög nr. 38/2001 banna slíka yfirfærslu gengisáhættu, sbr. athugasemd við frumvarp til laga nr. 38/2001:“Samkvæmt 13. gr. og 1. mgr. 14. gr. frumvarpsins verður ekki heimilt að binda skuldbindingar í íslenskum krónum við dagsgengi erlendra gjaldmiðla.  Er talið rétt að taka af allan vafa þar að lútandi."

Í uppgjörssamningum skilanefnda og kröfuhafa gömlu bankanna er gengið út frá því að yfirfærsla gengisáhættu hafi verið lögleg.  Samningarnir taka því ekki mið af skaðabótaskyldu bankanna gagnvart lántakendum gengisbundinna lána skv. 18. gr. laga nr. 38/2001.

Niðurfærsla höfuðstóls slíkra lána til jafns við fyrri uppfærslu vegna gengisbindingar myndi nema hundruðum milljarða króna. Útfærsla uppgjörssamninganna án dómsúrskurðar um lögmæti gengisbindingar og hugsanlega skaðabótaskyldu væri glapræði.

Virðingarfyllst,

Gunnar Tómasson, hagfræðingur"

Tíundi kröfufundurinn í vetur

Athugasemdir

[Hólmsteinn Brekkan (IP-tala skráð) 12.2.2010 kl. 23:25]

Dómurinn í dag vegna Lýsingar er bara fyrsta skrefið og vekur von.
 
Við erum einnig á vaktinni vegna bíla ó lánanna og nú fer skriðan af stað.
 
Eftirfarandi texti mun birtast sem auglýsing í blöðunum eftir helgi.

Texti:
Hefur þú sögu að segja vegna viðskipta við SP fjármögnun, AVANT, Lýsingu eða önnur fjármálafyrirtæki vegna bíla ó lána?
Til að styrkja áframhaldandi þrýsting á fjármálafyrirtækin auk annara aðgerða óska Hagsmunasamtök Heimilanna eftir þinni sögu ásamt öllu því skriflega sem viðkemur, einnig tölvupóst.
Gögn má senda á: [e-mail] eða með almennum pósti á: Hagsunasamtök Heimilanna, b.t. Hagsvið, Skipholt 50b, 105 Reykjavík.
Hvetjum alla til að skrá sig í samtökin á: www.heimilin.is

Lifi byltingin!